Zeugnis Mirjam B.
Zeugnis Angie K.
Zeugnis Simone H.

Zeugnis Mirjam B.

Woni im Herbst 2009 für 3 Mönät uf Italie gange bin, hani nonig gwüsst, dass ich ä Veränderig fürs Läbä duremache wird.

Bis zu dem Ziitpunkt hani MIS Läbä gläbt. Ich han ä super Chindheit gha, bi inre liebevolle Familie ufgwachse und bi immer vor Unglück und Leid bewahrt worde. Natürlich han au ich schwierigeri Ziite duregmacht und bin in Kontakt mit Alkohol und Tabakware cho, aber ich bi nie würklich Gfahr gloffe, ine Abhängigkeit zrutsche. I dä Schuel wie au im Fuessball hani immer gueti Leistige erbracht. Scho mis Läbä lang hani mich dur än unbedingte Wille, Ehrgiiz und Disziplin uszeichnet. Bis zu minere Gymiziit bini sehr schüchtern, zrughaltend und sensibel xi, ide Schuel hani mi amix chum getraut öpis zsägä. Das het sich denn schlagartig gändered. Ich ha mi göffnet, bi luut, schlagfertig und dominant worde. D’Rueh und Verletzlichkeit vu mim Herz hani i dä Tüüfi vu minre Seel vergrabe. Je meh ich die Eigeschafte zrugdrängt ha, desto grösser isch d’Einsamkeit i mir worde. Ich han mi nach Liebi und Geborgeheit gsehnt, nach Wärmi und Zueflucht; nach öperem, wo mi würklich verstaht.

Ich han zwar nie ä Abhängigkeit vu Droge oder so erläbt, defür ganz ä anderi, genauso gföhrlichi. Mini Sehnsucht nach öperem, wo mi verstaht, het mi ine Abhängigkeit vu Mensche gfüehrt. Ich han mis ganze Herz a Mensche ghänkt, wo mir nöch gstande sind. Woni im 2009 uf Italie gange bi, bini mr ned bewusst xi, dasi mi i sonere Abhängigkeit befunde ha. Mini bescht Fründin isch mis ein und alles xi. Es isch fasch kein Tag vergange, wo mr eus ned gseh hend. 3 Wuche bevori wieder vu Italie hei cho wär, hemr eus für äs Wuchenend ide Schwiiz troffe. Obwohl mir eus es Ziitli ned gseh gha hend, hemr eus nüt zsäge gha. Plötzlich isch ä Distanz zwüsche eus xi, wo mr eus ned hend chönne erchläre. Ich bi mitme mulmige Gfühl uf Italie zrug, und das Gfühl isch ned unbestätigt bliebe. Scho es paar Tag spöter hani es Mail becho, wo sie gschriebe het, mr müssed eusi Fründschaft beende.
Dass ihres Herz sich vu mir abgwändet het. Dass sie ohni mich läbä chan. Und dass ich endli loslah müess. Woni die Wort gläsä ha, isch mis Herz i 1000 Teil zersprunge. Eimal meh bini elei xi. Ich ha tagelang brüelt, bi nur usegange zum id Sprachschuel zgah. Mis Herz isch zerstört xi. I dere Hilflosigkeit, woni kein Usweg meh gseh ha und total elei irgendwo in Italie gsesse bi, hani Gott zum erschte Mal würklich um Hilf bittet. Ich han zu ihm gschrouä. Und er isch mir treu xi, obwohl ich ihm 20 Jahr lang kein Platz i mim Läbä igruumt ha. ER isch de Einzig xi, wo i dere schwere Ziit bi mir xi isch. De Einzig, a dem ich mich ha chönne festhebe. De Einzig, wo mr i dere uswegslose Situation Halt undr de Füess gä het. Er het mr Isicht gä und ufzeigt, dass die Fründschaft nüm gsund isch. Mir isch klar worde, dass de 1. Platz i mim Läbä ihm gebührt und niemerem susch. Dur die Ziit het mi ein Bibelvers ganz bsunders begleitet und zwar 1. Korinther 10,13: „Was eurem Glauben bisher an Prüfungen zugemutet wurde, überstieg nicht eure Kraft. Gott steht zu euch. Er lässt nicht zu, dass die Versuchung grösser ist, als ihr es ertragen könnt. Wenn euer Glaube auf die Probe gestellt wird, schafft Gott auch die Möglichkeit, sie zu bestehen.“

A dem Tag hani Gott zum erschte Mal richtig erlebt. Mir isch bewusst worde, was Jesus am Chrüz für mich gmacht het. Das er sis Läbä glah het, damit ich chan frei si vu jedere Abhängigkeit und Sünd, und ä Beziehig zu Gott chan ha. Die letschte Wuche in Italie sind so intensiv xi, ich ha jede Tag in Gottes Gegewart gläbt und bi trotz dem grosse Schmerz i mim Herz vonre unbeschriebliche Freud erfüllt xi. I de druffolgende Täg hetr mir denn as Herz gleit, früehner hei und as Hillsong Konzert zgah. Döt hani mitre guete Fründin äs Gebät gsproche, zum d’Füehrig vu mim Läbä Gott azvertraue. Ich ha kein Tag vu mim Läbä meh ohni ihn welle verbringe.

Sit dem het sich vieles i mim Läbä veränderet. Ich bi ruhiger und entspannter worde, gseh vieles glassener, nimm mir meh Ziit für mich und lass mis Herz jede Tag bi Gott Energie, Chraft, Liebi und Freud tanke. Ich möchte nüm abhängig sii, weder vu Menschen no vu Umständ. Natürlich isch ned alles Friede, Freude Eierkuchen. Au im Läbä als Christ gits Schwierigkeite. Jede Tag isch en Kampf geg falschi Gedanke und Wünsch, jede Tag bruchts ä neui Entscheidig für Gott und geg d’Sünd. Mängisch chömed au alti Begierde und Verhaltensmuster zrug. Aber egal i wellere Situation ich mich befind, ich weiss Gott isch da. Er füehrt mi und laht mi nie elei. Ihm chani vertraue, uf ihn chani mi jederziit verlah.

Was würklich zehlt im Läbä isch, dass mr öper het, wo immer da isch. Öper wo zuelost, dich liebevoll in Arm nimmt und dir i jedem Moment s’Gfühl git, wichtig z’si. Öper wo mit dir lacht und brüelt, wo di nie enttüscht und uf de du dich immer verlah chasch. Öper wo d’Tüüfi vu dim Herz kennt, dir alli Last abnimmt, wenn du nüm magsch, und sogar für dich stirbt, damit du läbä chasch. Das isch wahri, bedingigslosi Liebi. Ich ha sie gfunde…

Zeugnis Angie K.

Ich bi eigentlich sehr glücklich gsi. Ich ha ä Familiä gha. Doch ufeimal isch alles zämmä gstürzt. Jedä Tag häts Strit geh und gägäständ sind kaputt gangä. Uf eimal ha ich min Vater mit sinä Koffärä gseh, er hät eus verlah… ich has nöd chönnä begriffä, wiso verlaht er mich? er isch immer min Beschützer gsi! Mini Muätter isch den i grossi Depressionä gfallä und hät all ihri Wuät und Schmärzä a mir usglah. Ich bi au no gmobbt wordä will ich so dick gsi bi. Äs isch nöd lange gangä und ich bi id Magersucht gheit… ich bi sehr stolz uf mich gsi, ich ha gwüsst gha, das ich öpis erreicht ha! Doch diä Freud hät au nöd lang ghebät und den ha ich mich as Mässär gwändät und bi inä Drogenszene inä grutscht(bi immer am suffä und kiffä gsi) und ha mängischa au uf dä Strass gschlafä.

Uf eimal ha ich äs riiisä gschänk vo GOTT becho, er hät mir än Fründ gschänkt. ich ha wieder därfä lärnä was liäbi isch, ich ha ihm eifach chönä vertrauä! ich ha wiedär än Sinn i mim LÄBÄ gha! Er isch mis läbä gwordä! Uf eimal ha ich gmärkt das au er mich nümm am Läbä phaltä cha. Ich ha mich scho verabschiedät gha, doch es isch alles anders cho! Ich bi dur ä Kollegin id Jugi cho. Ich bi zwar bekifft cho aber ich ha gwüsst gha, das ich nomal cho muss eifach nüchtern. Ä Wuchä druf bin ich fürä gangä go bätä, das JESUS i mis läbä trättä söll. Ich ha scho lang nümm so es schöns gfühl i mim Härz gha. I däm Moment han ich gwüsst, dass Jesus all mini schlächte sache, wo ich frühner gmacht han, dur sin Tod am Chrüz vergä hät und das hüt immer na tuet.

Ich han gwüsst, da ich jetzt sis Chind dörf sii und er für mich sorgt. Endlich hani en Sinn für mis Läbe becho. Doch es isch u schwer gsi mich a däm Gfühl fest zhebä, will mini Muätter nüt vo JESUS het wellä wüssä und ihri Wuät immerno a mir usglah hät und min Fründ kei ziit meh gha hät für mich. Äs paar Wuchä druf isch in Basel ä Mäss vo dä Joyce Meyer gsi. mini Muätter hät s mir verbotä gha. Ich bi trotzdem gangä und ha en brief gschriebä äs isch gstandä, das wänn sie dä Briäf list ich scho lang in Basel seg. Ich ha eifach mal JESUS i mir chönä würkä lah! Uf äm Heiwäg han ich voll Angst becho, ich ha bätät und ich ha soo ä Gnad becho mini Muättär hät gschlafä!! Ich bi voller dank und freud erfüllt gsi! ich ha immer meh mit JESUS därfä ärläbä und wän ich mal Angst becho ha,ha ich immer an Römer 8, 31 dänkt! döt staht: wenn Gott für mich isch wer söll den gäg mich si?!

ich ha gmärkt, dass ich mit mim Fründ schluss machä muss, will er mich immer wieder zurg ziäht, vo dä beziähig mit JESUS! ich ha das den gmacht und es hät mer u weh ta ich has nöd chönä verstah wieso?!? Wieso nimmt er mir öpis vom wichtigstä i mim läbä?! Ich ha mich so zimli vo GOTT abgwändet, bis ich gmerkt ha, das er s mir nur as Härz gleit hät, ob ich s mach isch doch mini entscheidig gsi ! Ich ha därfä lärnä das er scho weiss wieso so het müässä si! und ich ha gmärkä das ich glüklich bi so wiä ich jetzt därf läbä! Ich ha immer gmeint er nimmt mir alles wäg, däfür nimmt er mir nur das uf d Sitä wo ich nümm bruch oder wo mich vo ihm trännt und ich ha därfä lärnä ihm z vertrauä und ihm alles id Händ legä! Ich freui mich scho uuu mega uf das, wo er für mich parat hät!! Will ich weiss es wird mis läbä immer und immer meh zum positiviä wändät! Ich bi so dankbar das er mis liächt i dä Dunkelheit isch! wiäs im Psalm 119, 14, 105 staht: Dän dies Wort isch wiä äs liächt i dä Dunkelheit!

Isch au er dä wo i dä Dunkelheit dir äs liächt därf si?!? Wen er nöd! ich chas nur empfehlä!! Vorämä halbä Jahr ha ich nöd dänkt das s läbä so schön und farbig isch. Er hät mer zeigt was läbä heisst! Mis Härz cha wieder strahlä!! Und ich weiss ich wird alles schaffä!! Will JESUS mis Läbä füährt! Ich weiss er laht mich nümm los!! Und ich dank ihm vo ganzäm härzä für diä BEST Familiä wo er mir gschänkt hät! ich ha die bestä Gschwüstärti becho! wo mich im glaubä unterstützät! wo aber au ich ä Unterstüzig därf sii!!! Ich bi IHM soo dankbar! Är hät mis läbä so zum bestä gwändät!!und wiä is bi dir?? Ich chans eu nur uf s härz legä!! Chumm zu ihm!! Er wartät! Und er freut sich, wen du erchänsch was er am Chrüz für mich und dich ta het! He er liebt eus soo fest!! Er het scho gwüsst was mir machäd bevor mirs gmacht hend!! Und glich isch er as chrüz und ich weis er würs wieder tuä!! Und zwar für jedä mänsch uf därä Wält egal was du gmacht hesch !!! Er liebt dich!! Wer cha scho sägä das er sich für jedä Mänsch wür opfärä egal ob er dich liebt oder nöd und machts den au ??? Es hets nur einä gmacht und es wird au immer nur einä geh JESUS CHRISTUS min retter!!! Und wer isch din retter??

Zeugnis Simone H.

Ich bin inere total unchristliche familie ufgwachse und darum au überhaupt nöd religiös erzoge worde. Ich han das überhaupt nöd kennt, glaube... eigentlich bin ich e richtigi atheistin gsi. Ich han immer wele ales chöne wüsseschaftlich erchläre und han nur rational überleit.
Trotzdem han ich mich scho immer wieder gfröget, wiso ich eich da bin, wer ich überhaupt bin, was de sinn vom läbe isch? Und au konkreters: wiso dörf ich da ide schwiiz läbe mit sovil überfluss und luxus, während anderi chind uf dere welt verhungered? Warum dörf ich sone tolli familie ha, eltere wo sich nie hend wele scheide la und en brüeder wonich so gern han das ich mers läbe gar nöd chönnt ohni ihn vorstelle? Ich han mich so beschänkt gfühlt und han niemertem chöne danke säge...
Den hanich au no scho mit 15i es jobagebot becho vo mim trainer: ich han chöne d’usbildig zur schwümmlehrerin mache. Jetzt weiss ich scho das und au was ich während mim studium wird chöne schaffe und das ich mich so wird chöne finanziere. Und wider han ich mich gfröget: wiso dörf ich so glück ha? Ich liebe nämlich mini arbet – si isch für mich nöd e belastig sondern eher es hobby! Ich han eifach kei antworte gfunde uf all die frage und han au kei ahnig gha wo wiitersueche...

Und den hät sich uf eimal ales veränderet!
Ich han dur mini arbet öper dörfe kenne lerne wo mir vo Jesus verzellt hät. Ich bin gschockt gsi – han gar nüt me verstande. Ich han di ganz botschaft abgstosse, bin usem zimmer gloffe will ich nüme han chöne zuelose! Sonen glaube hetti ja alles zerstört was bis döt hi mis läbe gsi isch! Und doch hanis nöd chöne vergässe...
Den bin ich eifach mal id jugi – aso en gottesdienst wimmers hüt abig händ - mitgna worde. Zersch bini eifach so döt ghockt, han d lüüt agluegt wo um mich ume gsunge hend und nacher am pastor zueglost. Es hät mich gar nöd so berüehrt am afang, aber wo si s’zweite mal gsunge hend han ich gmerkt das ich ganz automatisch am mitsinge gsi bin. Und ich han beschlosse, wider emal z’cho zum usefinde öb ich mir das chönnti vorstelle mit dem Jesus.

S’nächscht mal won ich gsi bin isch vore vorbättet worde und ich han Gott s’erschte mal dörfe erläbe! Den han ich ihn bätte das er i mis läbe tritt wenns ihn gitt und das hät er gmacht! Ich han agfange mit ihm rede und han mich meh und meh ghört und verstande gfühlt
A eim abig den, wo Gott dur e anderi person zu mir gret gha hät, han ich mis läbe nach dem gspröch Jesus übergäh und um vergäbig vo all mine sünde chöne bitte. Ich han i säbem moment no gar nöd so verstande, was das gnau gheisse het, aber det han ich vo Jesus s ewige läbe gschänkt becho, will Er am chrüz gstorbe isch und so all mini sünde uf sich gna hät.
Churz druf het mir Jesus e wunderbari chligruppe gschänkt und ich han au suscht uu vil tolli lüüt chöne kennelerne da, wo mich im glaube gstärcht händ. Ich han mega vil mit Jesus dörfe erläbe, was die ständig zruggchomende zwiifel immer wider besiegt hät.

Sit Jesus i mim läbe isch sind so vil sache andersch und di meischte devo besser worde. Zwar chönd vil lüüt um mich ume nöd akzeptiere das ich mich verändere wott und verstönd nöd was ich gfunde han und es isch oft en kampf döte starch z’bliibe und nöd ufz’gä. Aber genau das stärcht mich au – ich han bis jez nöd ufgä und ich wird’s au nöd mache und das isch de gröschti bewiis für mich. Jesus ischs beschte wo mir je passiert isch!
Er het mir antworte uf mini frage gschänkt, hät mich vomne hoche ross abegholt, mir ghulfe lüüt z’vergä, mir zeigt winich situatione au us de sicht vo de andere chan gse – i dem binich nämli vorher es huen gsi, han immer nur wele mini meinig dureboxe. Und jez schaffet Jesus a mir und veränderet mich is positive! Er isch immer da, Ihm chan ich vertraue. Äntlich hanich öper gfunde won ich chan dankä säge! Und ich weiss ganz genau: Jez wo Gott für mich isch, wer söll da chöne gäge mich si?

Zurück